Netanyahu-an Israel tan inthlan ṭhat him lohah ngai

Israel Prime Minister Benjamin Netanyahu chuan a kaihhruai ṭangrual sorkarin buaina a tawh mek chinfel dan kawng a zawng mek a, a hun hmaa inthlan ṭhat buatsaih chuan an ram himna atan a hlauhthawnawm thei dawn niin a sawi.

Kar hmasa khan Netanyahu-a kaihhruai right-wing ṭangrual sorkara minister pawimawh, defence minister Avigdor Liberman chu Israel sorkarin Gaza Strip-a Hamas-te nena inkahhai puan a remtih avanga lungawi loin a bang a, a party Yisrael Beiteinu-in ṭangrual sorkar a thlawpna pawh a hnukdawk nghal a ni. Ysrael Beiteinu-in sorkar an thlawpna an tihtawp hnuah ṭangrual sorkar hian parliament, knesset-a seat 120 awmah seat 61 chauh a nei a, seat khat chauhin majority hi a nei pha a ni.

Hetih lai vek hain education minister, Naftali Bennett chuan defence minister-ah dah a phut a, dah a nih loh chuan sorkar aṭanga banah a vau zui bawk. Bennett-a party Habayit Hayehudi hian sorkar thlawpna an hnuhdawh ve leh chuan ṭangrual sorkar hian nakkum November thlaa a term tawp hun a hmang zo thei dawn lo a, inthlan ṭhat buatsaih a ngai dawn a ni.

PM Netanyahu chuan a hun hmaa inthlan ṭhat buatsaih a ngaih lohna turin hma a la a, party hrang hrangte a be kual mek a, mahse tun thlengin inremna an la siam thei lo.