May-in paihthlak a nih chuan Brexit tan a ṭha lo tih sawi

Britain Prime Minister Theresa May-i chuan prime minister a nihna aṭanga paihthlak a nih chuan European Union aṭanga Britain inlakhranna tur, Brexit tan a ṭha loin tihkhawltlai a ni dawn tih a sawi.

Kum hnih kaltaah khan EU aṭanga Britain inlakhranna tur hian vote lak a ni tawh a, kum 2019, March 29 aṭanga inlakhran tuma ruahman ni mah se tun thengin ruahmanna kalpui dan tur hi tihchian a la ni thei lo.

EU aṭanga inlakhranna tur ruahmanna, draft divorce deal chu kar kalta Nilaini khan tlangzarh a ni a, he ruahmanna hi minister eng emaw zatin duhloin an ban phah a, bang zingah hian Brexit minister ngei pawh a tel. MP ṭhenkhat chuan prime minister hi bang turin an nawr bawk.

Mahse May-i chuan ruahmanna an siam anga beih chhunzawm zel a tum tih a sawi a, mahse EU leh Brexit thlawptu lawmaker zingah draft agreement siam dana lungawi lo an awm vangin, Parliament-ah a tlang zo dawn em tih hriat a ni lo a, hei vang hian inrema mumal tak awm loa EU aṭanga Britain a inlakchhuah mai hlauhthawnna pawh a awm a ni.

May-i chuan an ram hmalam hun tur an ngaihtuah mek tih sawiin, hetiang huna hruaitu thlak ringawt chuan inbiakna a tihawlsam phah dawn lo tih a sawi. Inbiakna tihkhawtlai a nih chuan Brexit pawh tihkhawtlai a nih phah thei a ni, a ti.

Brexit thlawptu senior minister-te chuan inremna an siamdante siamṭha turin May-i an nawr mek a, mahse May-i thlakna tur dang an awm chuang lo nia a sawi thu British media-te chuan an sawi. Kar kalta Ningani-a bang, Brexit minister hlui Dominic Raab chuan May-i chu hruaitu a nihna anga a thlawp thu a sawi a, mahse draft deal a siam erawh a ṭha tawk lo a, a thlak a ngai a ni, a ti.