NKorea hotuin a tlawh theih nan SKorea inbuatsaih

North Korea ram hotu lu ber, Kim Jong-un chuan kumin chhung ngeia South Korea ram a tlawh theih nan ṭha taka an inbuatsaih thu SKorea unification ministry chuan a sawi.

Unification ministry thupuangtu, Baik Tae-hyun chuan Seoul-a press conference a neihah, Korea ram pahnihten inremna an lo siam tawhte a taka kalpui nghal thei turin theihtawp an chhuah tih a sawi a, heng zingah hian SKorea-a Kim Jong-un zin tur pawh a tel a ni, a ti.

September thla khan SKorea President Moon Jae-in chu NKorea ramah Kim nena summit vawi thumna nei turin a zin a, hemi ṭum hian Kim pawhin a hma thei ang bera SKorea ram tlawh a lo tiam a ni. Hemi hnu hian Moon chuan Kim hi kumin chhung ngeia Seoul-a a zin theih beisei a nih thu a sawi.