Russia laka an invennan Ukraine ralthuam kan pe ang : Joe Biden

United States president Joe Biden chuan nimin khan Russia-in ni 20 chhung a run tawh Ukraine tan ralthuam, ei tur leh sum lama ṭanpuina an pek tur thu a sawi.

US chuan indo tuar mek, Ukraine mipuite chu lawm taka a dawnsawn theih thu sawi bawkin, "Ukraine-in Russia sipaite laka an inven theihna turin ralthuam an neih dan tur kan ruahman sak dawn a ni. Pawisa leh ei tur, Ukraine mipuite chhanhim nan chawmdawlna kan thawn dawn. Ukraine mi raltlante chu lawm takin kan pawm thei e" tiin Biden chuan a twitter kaltlangin a tarlang.

Britain-in Russia hian Ukraine laka chemical emaw biological weapon emaw hman a tum maithei nia a sawi hnuah US President chuan he thu hi a sawichhuak a ni. US hian a hmain Ukraine sipaite tan sipai hmanrua USD mtd 350 hu a lo thawn tawh bawk.

Report ṭhenkhat chuan Russia hian China aṭangin sipai ralthuamte lakluh a tum mek tih an tarlang a, mahse hei hi China chuan thudik lo niin a sawi thung.

February 24-a Russia-in Ukraine a run aṭang khan civil mi eng emaw zat an thi tawh a, mi maktaduai hnih chuang chu Ukraine aṭangin himna zawngin an tlanchhuak tawh bawk.

Ukraine President-in martial law pawhseina tur bill thehlut
Ukraine president Volodymyr Zelenskyy chuan Thawhṭanni khan an rama sipai thuneihna sang pekna dan, martial law hman mek chu thla khat dang pawhsei dilna Parliament-ah a thehlut.

Russia-in a run ṭan ni, February 24 khan Ukraine ramah martial law hi thla khat atan puan nghal a ni. Hei hi March 24-ah a tawp dawn a, mahse Russia nen hian an la indo chhunzawm reng avangin President Zelenskyy hian martial law hi ni 30 dang pawhsei a tum leh ta a ni.