World Bank-in Ukraine tan USD mtd 200 pek belh leh dawn

World Bank chuan Thawhṭanni khan Russia-in a run avanga harsatna lian tak tawk mek, Ukraine ram tan USD maktaduai 200 dawn an pek belh dawn a sawi.

World Bank hian kar liamta khan Ukraine tan USD mtd 723 pek alo remti tawh a, mahse ram chhunga harsatna tawk mekte tan ṭanpuina hi an pek belh leh dawn a ni. Hei hi World Bank-in Ukraine chhawmdawlna tura USD tluklehdingawn thum pekna tur, package an lo siam aṭangin pek an ni ang.

Ukraine ram mipuite ṭanpuina sum hi kar ruk aṭanga kar riat chhunga pek zawh fel an tum thu World Bank president David Malpass chuan a sawi bawk. Malpass chuan thil thleng chungchang sawiin, "Boruak rit tak hnuaiah kan awm mek a, Ukraine hi eibar zawnna kawng tihtawp sak hmak an ni. An thlai tharte pawh seng thei loin an awm mek a ni," tiin Russia sipaite chuan Ukraine chu ei leh in mai bakah sum lam thlengin hrek an tum a ni, a ti. "Nitin deuhthaw hian thil pawi leh rapthlak tak a thleng fo mai a ni," tia sawiin, heng ṭanpuina sum hi highway, bridge leh infrastructure pawimawh tak tak sak ṭhatna atan hman a nih tur thu a sawi.

Malpass chuan Ukraine ṭanpui tur hian bank chuan kan pawisa neih ang angte kan rawn thehchhuak a ni, a ti. World Bank chuan Ukraine tanpuina sum pek tura pawm tawh hi USD mtd 925 vel a ni tawh tih a sawi bawk.