Russia-in Biden leh US official dangte hrekna a tichhuak

Russia chuan United States president Joe Biden, Canada prime minister Justin Trudeau leh US top official ṭhahnem takte hrekna tur “stop list” chu tichhuakin, heng mite hi Russia rama an luh a khap.

President Biden bakah hian, defense secretary Lloyd Austin, CIA chief William Burns leh national security adviser Jake Sullivan-te pawh Russia-in a hrek zingah hian an tel. Hei hi Russia-in Ukraine a run avanga US-in Russian official eng emaw zat hrekna a siam a chhanletna a ni.

Russia "stop list"-a tel dangte chu deputy national security adviser Daleep Singh, US agen­cy for international development chief Samantha Power, deputy treasury secretary Adewale Adeyemo leh US Export-Import bank chief Reta Jo Lewis te an ni. Russia hian Biden-a fapa Hunter leh secretary of state hlui leh democratic presidential candidate lo ni tawh, Hillary Clinton pawh hrek zingah hian a telh bawk.

Russia foreign ministry chuan US official, military officer, legislator, businessmen leh media mi Russia dodal leh ngaithei lo "Russophobic"-te lakah hrekna dang pawh a la siam belh zel dawn tih an sawi.

Hetih lai hian US Treasury Department chuan Russia thlawptu, Belarus ram president Alexander Lukashenko leh a nupui hrekna a siam thar ve bawk a, Canada pawhin Ukraine ram beihna thlawptu nia a puh, Russian official 15 hrekna a siam bawk.