UN-in Myanmar sipaite war crime, innghaisak leh inthahna thlenah puh

Myanmar sipaite'n civil sorkar paihthlaa thuneihna an chan hnuah sipaite chu mihring dikna chanvo nasa taka palzut sak a, inthahna leh an mihringpuite laka pawikhawihna nasa tak thlenah United Nations chuan a puh. Hei hi UN-in nikuma Myanmar sipaiten sorkar an paihthlak hnua human rights report chungchang mumal taka a tihchhuahna hmasa ber a ni.

UN high commissioner for human rights Michelle Bachelet chuan security force-te hian mihring nunna zah lohna lian tak lantirin, thlawhtheihna leh ralthuam rip tak tak hmangin mihring tamna bialte an bei a, civil mite an bitum niin a sawi.

Sipaite kut tuartu tam tak hi an lu ah silaia kahfuh an ni a, ṭhenkhat chu hal hlum an ni a, mi dang ṭhenkhat chu sipaite hian manin nasa takin an nghaisa a, midangte nena an inbeihnaah inphenna atante an hmang niin report chuan a tarlang.

Bachelet chuan, "International law palzutna nasa thleng avanga Myanmar mipuite tawrhna hian khawvelin awmze nei leh na taka a chhanlet a phut a ni," a ti. Hetih lai hian sipaite chuan civil mi tam takte thihna thlentua puhna chu a pha thung a, an ram chhunga buaina thlen chhanah firfiak tia a sawi, sipai sorkar duhlotute a puh a ni. Sipaite chuan boruak muanawm a awm nan leh, an ram himna turin hna an thawk zawk tih an sawi.

Sipai sorkar duh lohna kawng zawha kalkhawmte chunga an chetdan leh , Aung San Suu Kyi leh mipui sang chuang man a; tanina khung luih an nih avangin khaw­thlang ramte chuan sipaite leh an sumdawnna hmunte lakah hrekna hrang hrang hi an lo siam tawh a ni.

UN chuan report a tihchhuah hi sipaite kut tuarte mi tam tak bakah thil thleng mita lo hmutute an kawmna, an thusawite satellite imagery, multimedia file leh information dang aṭanga finfiah a nih hnua siam a nih thu a tarlang. Sipaiten an mi mante hi thu an zawhfiah laiin an nghaisan nasa ṭhin hle thu sawiin, ṭhenkhat chu ceiling-ah khaiin, electric hmanga shock te an tawk a, ruihhlo hmanga an chiu bakah mipat hmeichhiat lam hawia khawihte, pawngsawl tawkte pawh an awm tih report chuan a tarlang.

Report tarlan danin, sipai leh an thawhpuite kut tuara thi hi mi 1,600 chuang an awm tawh a, mi 12,500 te chu hren mek an ni bawk. Mi 4,40,000 chuangte chuan an ram an tlanchhiatsan tawh a, maktaduai 14-te chu dinhmnun harsa takah, chhawmdawl ngaiin an awm tawh bawk. Mahse heng mite chhawmdawlna hi sipaite hian an danchah sak fo nia sawi a ni.