South Korea-a Omicron hri lengin zual lam pan zel

South Korea chuan coronavirus kai thar leh thihpui tam lamah record thar siamin, ramchhungah chak takin hri inkaichhawn awlsam tak Omicron chu a darh leh mek.

Korea Disease Control and Prevention Agency (KDCA) chuan nimin khan an ramah Covid-19 kai thar mi 6,21,328 an awm thu leh heng zinga mi 62-te chu ramdang aṭanga rawn lut an nih thu a sawi. Nimin vek khan hri vanga thi mi 429 an awm bawk a, Covid-19 thihpui hi mi 11,481 an tling tawh a ni.

Hri leng vanga khuahkhirhna a siamte chu sumdawng tenau leh a nghawng nat zualte chuan an sawisel nasat vangin sorkar chuan a thlahdul chho ṭan tawh a, hetih karah hian hri kai hi an rawn pung thar leh hluai a ni. Vawiin hian sorkar chuan khuahkhirhna siamte hi a thlahdul belh zel dawn em tih a puang ang. Khuahkhirhna an la hman mek zingah hian zan lama sumdawnna kalpui khap leh mi paruk aia tam punkhawm khapna a la tel.

SKorea hian test, track, tracing leh quarantine hmangin ramchhunga hri leng khuahkhirh a tum leh mek a, nimin khan ni khatah hripui thihpui tam lamah record siam mah se, hri kai tawh aṭangin thihpui hi 0.14% an la ni a, ram dang nena khaikhin chuan an la hniam hle.

Health lam thuneitute chuan Omicron leng mek chuan a peak a thlen ṭep tawh an rin thu an sawi a, hemi rual hian an lo rinlawk aiin nitina hri kai thar zat chu an tam zawk hle tih an sawi bawk.

Mi maktaduai 52 awmna, South Korea-ah hian Covid vaccine full dose-a la tawh hi 87% vel awmin, booster dose la pawh 63% an awm tawh.