Israel-ah Covid variant thar hmuchhuak

Israel ministry of health chuan Nilaini khan Covid-19 variant thar pahnih an hmuhchhuah thu sawiin, official-te erawh chuan hlauhthawnna tur a awm loh thu an sawi.

Hri an hmuh chhuah thar hi Omicron Covid-19 sub-variant pahnih BA.1 leh BA.2 inzawm a nih thu leh, Israel-a Ben Gurion airport-a khualzin rawn lutte PCR an test aṭanga hmuhchhuah an nih thu ministry chuan a tarlang.

"Variant hi khawvelin a la hmelhriat loh a ni," tiin "Hri kaiteah hian khawsik, lu na leh tihrawl natna angin a lang chhuak a, a hranpaa enkawlna an mamawh lo a ni," tih ministry chuan a sawi. Israel-a pandemic response chief, Salman Zarka chuan "Variant infin hi kan hriatchian tawh thil a ni. Tunah rih chuan natna khirh tak a thlen theih kan ring lo," a ti.

Israel mipui maktaduai 9.2 zinga maktaduai 4-te chuan coronavirus vaccine dose thumna an la tawh a ni. Israel hian kum 2020, December khan vaccine semchhuah hna hi an kalpui ṭan a, khawvel ram zinga vaccination campaign kalpui hmasa ber zinga mi an ni. Tun thla tir lam khan sorkar chuan Omicron variant vangin kum 60 chin chunglam leh health worker-te tan Covid vaccine dose lina an pekchhuah tur thu an lo puang tawh bawk a ni.