US-in Ukraine venhimna atan USD mtd 800 pe dawn

Ukraine president Volodymyr Zelensky-a'n United States president Joe Biden hnenah sipai ralthuam thuam chakna tura a ngen hnu lawkah, Biden chuan Ukraine ram tan USD maktaduai 800 ṭanpuina pek belh a nih tur thu a puang. Kar khat chhung lekin US hian Ukraine defence tan USD tluklehdingawn khat chuang a seng tawh a ni.

President Biden chuan Nilaini khan Ukraine venhimna kawnga puihna turin USD mtd 800 an pekbelh tur thu hi a puang. Tanpuina an pek tur zingah hian Stinger anti-aircraft system 800, Javelin 2000, light anti-armory weapon 1000, AT-4 anti-armour system 6000, tactical unmanned aerial system 100; grenade launcher 100, rifle 5000, pistol 1000, machine gun 400 leh shotgun 400 bakah small arms ammunition mtd 20 chuangte leh grenade launcher, mortar rounds; body armour 25,000 leh helmet 25,000 a tel. US President chuan indona ṭan hmain Ukraine tan USD mtd 650 an pek tawh thu leh indo hnuah USD mtd 350 an pek thu sawiin, hei hian Russia sipaite inluling lutuk tur chu eng emaw chen a dan thu a sawi.

Biden chuan Ukraine President Zelenskyy chu a fak rualin, no-fly zone siam emaw fighter jet emaw pe tura a ngenna chu a tihhlawhtlin sak theih loh tur thu a sawi bawk. Ukraine laka Russia president Vladimir Putin chet dan chuan khawvel ram dangte a ti thinurin a tih pumkhat phah ta zawk niin a sawi a, Putin chuan hremna na tak a la hmachhawn ngei dawn a ni, a ti.