Japan-a lirnghingah mi 4 an thi, mi 90 chuangin hliam tuar

Japan ram hmar lam,Fukushima tuipui kamah Nilaini zan khan magnitude 7.4 a nain lir a nghing a, lirnghingin chhiatna a thlenah mi pali an thi.

Lir nghin hnu, Nilaini zan vek hian tsunami na vak lo a thleng bawk a, mahse a nat chhunzawm tak loh avangin nimin khan Japan Meteorological Agency chuan tsunami warning a tihchhuah pawh a sut ve leh nghal a ni.

Prime minister Fumio Kishida chuan nimin khan Parliament-ah lirghing vanga mi pali an thih bakah, midang 97 in hliam an tuar thu a sawi.

Japan Meteorological Agency chuan a tirah lirnghing nat lam hi magnitude 7.3 tiin a sawi a, mahse nimin khan 7.4 zawk a nih thu sawi lehin, a nghin ṭanna chu sea level hnuai km 56-60-a thuk a nih thu a sawi a ni.

Lirnghing vang hian Tokyo khawpuia in nuai sarih vel leh, Japan hmarchhak biala in nuai 1.56 vel chuan power supply an nei lo a, mahse rei vak loh hnuah siamṭhat leh nghal a ni. Fukushima city-a bullet train pawh lirnghing vang hian a let bawk. Fukushima Daiichi nulcear plant-ah erawh thil pawi engmah a thlen loh thu nuclear lam thuneitute chuan an sawi.

Chief cabinet secretary Hirokazu Matsuno chuan tualchhung thuneitute chuan uluk takin chhiatna thlenna hmun an endik thu a sawi. Lirnghing thlen duhna hmun, Ring of Fire tia sawiah Japan hi a awm avangin lirnghing na tak takin a lo sawi fo tawh a ni.