Israel-in inthlan ṭhat neih ngai dawn lo

Israel Education Minister Naftali Bennet chuan an party chuan Prime Minister Benjamin Netanyahu-a kaihhruai ṭangrual sorka a thlawpna a hnukdawk dawn lo tih a sawi tak vangin a hun hmaa inthlan ṭhat buatsaih a ngai dawn ta lo a ni.

Minister Bennet chuan an party chuan PM Netanyahu chu Israel himna vawnghim tur leh an buaina chingfel turin hun an pe leh dawn tih a sawi a, heng zingah hian Gaza leh Lebanon aṭanga an ram himna tiderthawng thei awmte chu khauh taka a beih let an phut tih a sawi.

Israel cabinet-in Gaza Strip-a Palestinian helpawl, Hamas nena inkahhai puan a remtih avangin Defence Minister Avigdor Lieberman chu lungawi loin a bang a, a party Yisrael Beiteinu-in ṭangrual sorkar a thlawpna pawh an hnuhdawk nghal bawk. Lieberman chuan inkahhai puan remtih chu firfiak laka tlawmna anga a ngaih thu a sawi.

Hemi hnu hian ṭangrual sorkara party lian pathumna Habayit Hayehudi party hotu, Naftali Bennet chuan defence minister-a dah a phut ve nghal a, dah a nih loh chuan sorkar thlawpna hnuhdawhah a vau zui a ni. Mahse Thawhṭanni khan Bennet chuan Netanyahu chu hun pek leh an tum thu sawiin, an thil phut pawh an sut leh nghal tih a sawi a, Israel-in hnehna a chan leh theihna tura an puih tur thu a sawi. Netanyahu-a hun vawi khat pek leh chu an ram tana ṭha zawk tura an ngaih avanga ti a nih thu a sawi bawk. Netanyahu hian defence ministry hi a chang zui a ni.

PM Netanyahu chu Palestinian helpawl nena inkahhai puan a remtih avangin sawisel a tawk nasa hle a, a party mi leh sa ngei pawhin an sawisel a ni.

Habayit Hayehudi in sorkar an thlawpna an hnuhdawh ve leh chuan Netanyahu kaihhruai sorkar hian nakkum November thlaa a term tawp tur chu a hmang thleng thei dawn lo a, a hun hmaa inthlan ṭhat buatsaih a ngai dawn a ni. Inthlan ṭhat neih chu an ram himna atan a ṭha lo tih sawiin, Netanyahu hian sorkar ṭhiah a nih lohna turin an thawhpui party hrang hrang hotute pawh a kawm kual hman a ni.