Maldives-in China nena FTA siam aṭanga inhnuhdawh tum

Maldives sorkar thar chuan China nena free trade agreement (FTA) an siam aṭangin inhnuhdawh a tum.

Maldives ṭangrual sorkara party lian ber, Maldivian Democratic Party hotu Mohamed Nasheed chuan anni ang ram te tan chuan khawvela economy lian ber dawttu ram China nena insumdawn tawnna tura inremna siam chu an tihsual a ni tih a sawi. Hei bakah he hi inremna hi a inbuktawk loin pakhat tan chauha siam ang a nih thu sawiin, China chuan an ram aṭangin eng thil mah a lei ve lo a ni, a ti.

Kar kalta Inrinni-a Maldives President thar atana lakluh, Ibrahim Mohamed Solih chuan Chinese lender te sum tam tak an batsak avangin an sum dinhmun pawh a ṭha lo tih a sawi.

FTA hi President hlui Abdullah Yameen-an nikum December thlaa China a tlawh ṭumin ziah a ni a, hemi thla vek hian a kaihhruai parliament chuan eptuten an dodal chungin he inremna siamna tur hi dakar khat pawh sawiho loin a pass zui nghal a ni.

Kumin January leh August thla inkar khan Maldives hian China aṭangin bungrua dollar maktaduai 342 hu a lalut a, hetihlai hian China rama a thawnchhuah chu dollar 265,270 man chauh a ni thung. China aṭanga an lakluh langsar zingah hian sa, agricultural product, pangpar, thlai, electronics leh toys-te a tel a ni.