Pakistan PM-in Donald Trump-a chhang let

Pakistan Prime Minister Imran Khan chuan US President Donald Trump-an ṭanpuina sum tam tak an pe chungin Pakistan chuan eng thil mah a ti lo tia a sawi chu chhang letin, US chuan a hlawhchhamnaah Pakistan chu tuartir a tum niin a sawi.

Pakistan leh US inkar boruak hi a ṭha lo chho hle a, US chuan Pakistan chu Islam firfiakte thlawpah puhin, a ram chhunga firfiakte bei let duh lohah a puh. US hian Pakistan ṭanpuina a pek ṭhin pawh a lo titlem tawh bawk a ni.

Fox News TV-in President Trump an kawmna, Pathianni-a an tihchhuahah Trump chuan kum 2011-a Pakistan ram chhunga US sipaiten al-Qaida firfiak pawl hotu, Osama bin Laden-a an thah hma pawh khan Pakistan thuneitute chuan Bin Laden a awm thu hi an hre lawk vek tih a sawi. Trump chuan Bin Laden chu Pakistan-a in nuam takah, military academy bul lawkah khawsain, Pakistan mipuite chuan hei hi an hre vek a ni, a ti.

Afghan Taliban firfiakte thlawpah puhna chu Pakistan chuan a pha a, hei bakah hian official-ten bin Laden an pui ṭhin nia puhna pawh thu dik lo a nih thu Pakistan chuan a sawi bawk. Imran Khan chuan, "An hlawhchhamna chhuanlama hmanga Pakistan tuartir a tum ai hian, US hian Afghanistan-a NATO sipai 140,000 leh Afghan sipai 250,000 ten firfiakte an bei chung leh, dollar trillion khat zet sen a ni tawh chunga Taliban te an chak thar zel chhan hi ngun taka a chhut chian a ngai zawk a ni", a ti.

Khan chuan US-in firfiakte do beihpui a thlak chu Pakistan in a tuar hle tih a sawi a, 9/11-a pawikhawihna thlengah Pakistan mi tumah inhnamhnawih lo mah se, US-in firfiakte do beihpui a neihnaah pawh Pakistan chuan tel ve a remti a, he indona avang hian Pakistan mi 75,000 zetin nunna an chan bakah, dollar tluklehdingawn 123 chuang a hloh bawk a ni, tiin a sawi.

Pakistan chuan Afghanistan-a US sipai awmte mamawh pekna tura kawngpui leh a boruak te pawh hman a remtihsak zel tih a sawi bawk.