US-in Pakistan chhawmdawlna titawp chhunzawm

US President Donald Trump chuan Pakistan-in an ram chhunga firfiak, zalen taka awmte a beih leh phawt loh chuan US-in kumtina chhawmdawlna a pek ṭhin, dollar tluklehdingawn 1.3 chu tihtawp chhunzawm zel a ni dawn tih a sawi.

Thawhlehni-a White House-a chanchinthar lakhawmtute a kawmnaah President Trump chuan, "Pakistan chu min pui turin kan duh a ni. Pakistan hnenah hian US dollar tld 1.3 hi kan pe tawh hrih lo. Min pui tura eng thil mah an tih loh avangin engmah kan pe dawn lo. Engmah" tiin a sawi.

President Trump hian tunhnaiah firfiakte beihletna kawngah Pakistan chuan a pui duh lo niin a lo sawisel fo tawh a ni. Kar kaltaa Fox News-a interview a neihah pawh, Pakistan chuan al-Qaida firfiak pawl hotu Osama bin Laden chu a ram chhungah a awm tih a hre reng a, mahse US hrilh duh loin US hnen aṭang hian ṭanpuina dollar tluklehdingawn tel a dawng reng thung a ni, a ti.

Hetihlai hian US-a Pakistan ambassador Hussain Haqqani chuan US tan Pakistan-in engmah a ti lo nia Trump-a sawi chu a dik lo tih sawiin, kum tam tak chu Pakistan chuan US hi a lo pui tawh a ni, a ti. Pakistan hruaitu dangte pawhn US chu lawmna chang hre loah an puh bawk.

Kum 1954 aṭang khan US hian Pakistan sipaite leh an economy puihna atan dollar tluklehdingawn 43 chuang a pe tawh a ni.