Kabul-a bomb puakah mi 50 thi

Afghanistan khawpui, Kabul-a sakhaw thila punkhawmna hmunah Thawhlehni khan thihchilh bomb a puak a, mi 50 an thi a, midang 83 in hliam an tuar.

Bomb hi Prophet Muhammad-a piancham lawmna puala Uranus wedding hall-a sakhaw hotute inhmuhkhawmnaah tihpuah a ni a, tunhnaia Kabul-a pawikhawihna thleng zinga thi an tamna ber zinga mi a ni.

Eng pawl mahin he bomb puak hi an tih niin an chhal lo a, Islamic State leh Taliban firfiakte chuan thihchilh bomb hi an tihpuah fo avangin ringhlelh an ni. Mahse Taliban chuan inhnamhnawihna an nei lo niin a sawi.

Wedding hall-a bomb tihpuah lai hian mi 1,000 vel an awm nia sawi a ni a, Kabul police thupuangtu Basir Mujahid chuan Islamic scholar leh anmahni zuitute chuan Eid Milad-un-Nabi festival pualin Koran thu chham turin an kalkhawm a ni, a ti. Bomb tipuaktu hian an inhmuhkhawmna laiah tak a bomb pai hi a tipuak a ni.