Yemen: Chaw ṭha tlakchham vangin naupang 85,000 thi

Save the Children chuan Yemen ramah kum thum chhungin naupang kum nga hnuai lam mi 85,000 zet chu taksa tana chaw ṭha ei an tlakchham vangin an thi niin a sawi.

United Nations chuan Yemen ram mi maktaduai 14 vel chu ṭam hmabakin an awm mek niin thla hmasa khan a lo sawi tawh bawk.

Kum 2015-a Saudi kaihhruai Arab ṭangrual ramten Yemen President Abdrabbuh Manour Hadi umchhuaktu, Houthi helte lakah beihpui an thlak a, tun thlengin tualchhung buaina hi a la reh thei lo a ni. Tualchhung indona thleng vang hian civil mi 68,000 an thi tawh a, mi nuai kaht chuangin hliam an tuar bawk niin UN chuan a tarlang. Inbeihna thleng reng leh, ṭangrual ramten mamawh chawk luhna kawngte an dan avangin mi maktaduai 22 vel chu chhawmdawl ngaiin an awm a, hei bakah hian tui hri leng vangin mi maktaduai 1.2 zetin harsatna an tawh belh phah bawk.

Yemen rama chhawm-dawl hna thawktute chuan ei tur ṭha neih loh vanga thi zat dik tak hriat chian a har hle niin an sawi a, report loh eng emaw zat an awm bawk tih an sawi.

Hun rei tak chhung tualchhung buaina an tawh vangin ei tur mante a sang chak hle a, hetihlai hian an pawisa hlutna erawh a tlahniam zel thung. Save the Children chuan mi tam tak ei tur ṭha neiloa dinhmun hlauhawm taka an awmna chhan pakhat chu ṭangrual ramten kawng an dan vang niin a sawi. Yemen-a Save the Children director Tamer Kirolos chuan naupangte hi an taksa mamawh leh chakna tur ei tur ṭha pek an nih loh chuan kumtinin thi an tam belh dawn niin a sawi. Ṭam vanga thi an punbelh zel a, hei hi ven theih niin a sawi.