Indona thleng mekah Ukraine mi 700 chuang thi tawh

Russia-in kar thum liamtaa Ukraine-a run aṭang khan Ukraine civil mi 700 chuang an thi tawh niin UN chuan a sawi.

UN political affairs hotu Rosemary DiCarlo chuan Ningani khan Security Council member 15-te hmaah hemi chungchang hi sawiin, thi zingah hian naupang pawh 52 an tel a ni, a ti. Thi zat dik tak hi hriat a har thu leh, an chhut ai hian an tam zawk a rinawm thu a sawi bawk.

DiCarlo chuan, mihring chen bitna hmun beih chuan nghawng a nei zau hle a, chenna in bakah hospital leh school-te pawh an chhe nasa niin a sawi.

UN human rights agency chuan February 24 leh March 15 inkar khan hliam tuar mi 1,174 a chhinchhiah tih DiCarlo chuan a sawi a, "Ukraine-a civil mi thizat leh infrastructure tihchhiat zozaite hi phat rual a ni lo. Uluk taka chhuichianna neiha hremna pek ngei an phu a ni," a ti.

World Health Organization chuan Ukraine healthcare chu ṭum 43 beih an ni a, mi 12 an thih bakah mi ṭhahnem takin hliam an tuar a, an zingah hian health worker-te pawh an tel tih a sawi. WHO Director-General Tedros Adhanom Ghebreyesus chuan, "Eng buaina pawh thleng se, healthcare beih hi international humanitarian law bawhchhiatna a ni," tiin Security Council hi a hrilh a ni.

Ukraine leh khawthlang rama a thawhpuite chuan Russia chu civil mite beiah an puh a, mahse hei hi Russia chuan phain, Ukraine-a special operation a neihah sipai leh a hmunhmate chauh a bitum thu a sawi thung.