EU ramah Omicron BA2 subvariant darh leh ṭan : EMA

Covid-19 subvariant, Omicron BA2 hri kai chu European Union (EU) ramah an pung mek tih European Medicines Agency (EMA) chuan Ningani khan a tarlang.

"EU ram tam zawkin khuahkhirhna an thlahdul mek laiin, member state ṭhenkhatah hri kai hi an pung leh ṭan a, Omicron BA2 darh leh vang niin a lang a, variant dangte aiin inkaichhawn a awlsam zawk a ni," tiin EMA-a strategy on biological health threats and vaccines hotu Marco Cavalieri chuan a sawi.

EMA chuan Covid-19 vaccine la la lote chu a rang thei ang bera vaccine la tur leh EU-ah vaccine panga lak tur a awm tawh thu a sawi. "Vaccine hian damdawi-in panpui ngai khawp leh thihna lakah min ven theihna sang tak an nei a ni," a ti. EMA-in vaccine pawmpuina a pek tawhte chu Pfizer/BioNtech, Moderna, AstraZeneca, Janssen leh Novavax-te an ni.