Taliban-in hmeichhiate tan High School hawng ṭan dawn

Afghanistan-a rorellai, Taliban chuan kar leh aṭangin zirlai hmeichhiate tan high school a hawng tawh dawn.

Education official chuan Ningani khan hei hi sawiin, hmeichhiate zirna chhunzawm phalsak an ni dawn tih chungchang hun rei tak an sawichian loh hnuah hmeichhiate tan zirna in hawn a ni tawh dawn tih a sawi a ni.

Ministry of Education thupuangtu, Aziz Ahmad Rayan chuan, "Zirlai mipa leh hmeichhiate tan school zawng zawngte chu hawn a ni ang," tia sawiin, hemi rual hian hmeichhiate tan ruahmanna hran siam a nih thu a sawi nghal bawk. Zirlai hmeichhiate chu mipa bulah zirtir an ni dawn lo a, zirtirtu pawh hmeichhia chauh an ni bawk ang. 

Thingtlang hmun ṭhenkhat, zirtirtu hmeichhia indaih lohna hmunah chuan zirtirtu mipa pawhin an zirtir phalsak an ni dawn tih Rayan chuan a sawi.

Rayan chuan, "Kumin hian zirna in khar a ni dawn lo a, school khar a awm a nih chuan education ministry chuan mawhphurhna laiin a hawn tir leh ngei dawn a ni." a ti.

Nikum August thlaa khawthlang ram thlawp sorkar paihthlaa Taliban te'n thuneihna an chan hnuah, an rama hmeichhiate chu school leh college kaltir turin ramdangte chuan an lo ngen fo tawh a ni. Kum 1996-2001 inkar thuneihna an chan lai khan, Taliban hian hmeichhiate a hrek nasa a, lehkha zir leh pawn lama hnathawh pawh a phalsak lo a ni. 

Mahse thuneihna an chan thar leh hnu hian sorkar huam zau zawk an siam tawh dawn tih sawiin, hmeichhiate pawh an dikna chanvo an zahsak tur thu an sawi. Mahse an sawi ang hian an awm lo a, zirlai hmeichhiate chu zirna chawlh tir an nih bakah, hmeichhe dinhmun pawh a chep nghal hle a ni.