US-in Canada leh Mexico ramri khar chhunzawm

US chuan Covid-19 hri leng vangin mamawh thila inkalpawh tih loah chuan Canada leh Mexico ramri chu December 21 thleng khar chhunzawm a la tum tih acting homeland security secretary Chad Wolf chuan a sawi. 

Kumin March 21 aṭang khan US chuan a ram ṭhenawm, Canada leh Mexico ramri chu Covid-19 hri leng vangin a khar a, mahse mamawh thilah chuan inkalpawh chu a remti tho a ni. Hri len hmaa an duh duha an inkalpawh ang kha khap a ni a, hei hi mipuite him tlan nan leh hri an inkai tawn lohna tura tih a ni tih a tarlang. 

US hi khawvela Covid-19 hri kai tamna leh hripui thihpui tamna ber ram a la ni chhunzawm zel. An ramah hripui kai hmuh chhuah tawh hi mi 1,20,70,712 an awm tawh a, heng zinga mi 72,43,488 chu enkawl dam tawh niin, he hri thihpui tawh hi mi 2,58,333 an awm tawh a ni.

Nimin thleng khan khawvel pumah Covid-19 kai hi 5,73,24,718 awm tawhin, mi 13,67,435 in an thihpui tawh. Hri kai mek 1,61,52,638 zingah 101,815 (1%) chu dinhmun ṭha lo,  ngaihtuahawm an ni. US dawtah India, Brazil, France, Russia, Spain, UK, Argentina, Italy leh Colombia-te chu hri kai tam zualna ram an ni. 

US Centers for Disease Control and Pre­vention (CDC) chuan America mite chu Thanksgiving holiday-ah zin lo turin a hriattir. 

Kar leh November 26 hi Thanksgiving day a ni a, hemi ni hian US-ah chuan chawlh hman ṭhin a ni. Thanksgiving kar hi US-ah chuan ram chhunga an zinkual nasat ber lai a ni ṭhin. Nikum khan Thanksgiving karah mi maktaduai 26 zet an zin kual a ni. 

Kumina hripui leng vangin mipuite chu zin chhuak lo turin CDC chuan a ngen a, mipuite fimkhur a ngaih zual hun niin a sawi. Mahse CDC Covid-19 incident manager, Dr Henry Walke chuan zin chhuak lo tura an ngennaah hian intihluihna erawh a awm lo tih a sawi. 

US president atana thlan Joe Biden chuan Covid-19 vanga US rampum inkharkhip a ni dawn lo tih a sawi a, mahse mitinte chu hmaituamna hman ngai pawimawh turin a ti. 

Ram pum huapa inkharkhip leh chu thil harsa tak tur a nih thu Biden chuan sawiin; bial, veng leh chhungkaw dinhmunte a in an loh avangin thil ṭha ber a ni lo tih a sawi. He thu hi video conference kaltlanga governor-te meeting a neihpuinaah a sawi a ni.

 

Joe Biden chuan ram economy chu tih ṭhuanawp emaw tihtawp emaw a tum loh thu sawiin, economy tih ṭhuanawp ai chuan virus (hri) chu tihtawp a duh zawk thu a sawi. Biden chuan state ṭhenkhatah hri kai an tlem a, heng hmunah te hian mihring hriselna atana insawizawina tur gym chu, ni khatah darkar li hawn ṭhin ni thei se a ti a, darkar li chhung chuan lut thei tur zat te pawh bithliah ni ṭhin se, a ti bawk.

Biden chuan theih ang anga hma lak a nih loh chuan ram economy a chhiat phah nasat theih thu a sawi a, economy hawng pah thoin hri dona hi kalpui chu ṭha a ti tih meeting-ah hian a sawi a ni. 

He meeting-ah hian Covid-19 vaccine chungchangte pawh sawilan a ni a, meeting-ah hian vice president thar tur Kamala Harris pawh a tel a ni.