Russia-in hypersonic missile hmangin Ukraine a kap

Russia chuan an missile thar ber, Kinzhal hypersonic missile chu Ukraine rama ralthuam dahṭhatna hmun tihchhiatna atan an hman thu a puang.

Russia-a Interfax news agency chuan Russia-in February 24-a Ukraine a run hnua hypersonic Kinzhal system a hman vawi khatna a nih thu a sawi. "Kinzhal aviation missile system-a hypersonic aeroballistic missile hmangin Ukraine-a Ivano-Frankivsk region chhunga Deliatyn khuaa missile leh aviation ammunition warehouse chu tihchhiat a ni," tiin defence ministry thupuangtu Igor Konashenkov chuan Inrinni khan a sawi.

Ivano-Frankivsk region hian NATO member, Romania nen km 50-a thui ramri inṭawm an nei a ni.

Odesa-a Black Sea port bula Ukraine sipai hmunpui tihchhiatnan Russia sipaite chuan anti-ship missile system Bastion an hmang tih ministry chuan a sawi bawk.

Russia hian an ralthuamte hi an chhuang hle a, president Vladimir Putin chuan nikum December thla khan khawvel puma hypersonic missile nei ṭha ber an nih thu leh, an missile-te chu chhui leh dan theih loh khawpa ṭha leh changkang a nih thu a lo sawi tawh a ni. Kinzhal missile-te hi kum 2018-a tlangzarh a ni a, khawvel hmuntina an duhna lai tak kap thei leh United States siam missile shield pumpelh thei a ni, an ti.