Russia-in raltlan 400 awmna bomb hmangin bei : Ukraine

Russia sipaiten Mariupol khawpuia art school-a tawmhimna zawnga khawsa, mi 400 chuang awmna chu bomb hmangin an bei niin city council chuan nimin khan a sawi.

He building hi Inrinni khan Russia hian a bomb niin an sawi a, thi leh hliam zat erawh hriat chian a la ni lo. Council chuan building tluchhe karah hian hliam tuarte an awm niin a tarlang.

Ukraine president Volodymyr Zelenskyy chuan Russia-in Mariupol khawpuia a beihna chu hun rei tak chhunga pawikhawihna raphthlak berte zinga mi anga chhinchhiah reng a nih tawh tur thu sawiin, tualchhung thuneitute chuan khawpuia cheng mi eng emaw zat chu Russsia sipaiten ramri lamahte an hruai thu an sawi bawk.

Urkaine hian Russia sipaite an beih letna turin US aṭangin ralthuam an dawng thuai dawn a, an ralthuam dawn tur zingah hian Javelin leh Stinger missile-te pawh a tel niin Ukraine National and Defence Council Secretary Oleksiy Danilvo chuan a sawi.

Europe-a steel works lian berte zinga mi tichhia
Europe khawmualpuia iron leh steel works lian ber zinga mi, Azovstal chu Russia sipaite'n beihpui an thlakna kal zelah an tichhia tih official te chuan an sawi.

Azovtal hi Mariupol khawpuia awm a ni a, "Europe-a metallurgic plant lian ber zinga mi tihchhiat a ni. Ukraine tan chuan economy lama an channa hi a rapthlak takzet tawh a ni," tiin Ukranian lawmaker Lesia Vasylenko chuan a sawi.