Sri Lanka-in paper indaih lohna avangin school exam ṭhulh

Sri Lanka-a printing paper indaih lohna avang leh rampawn aṭanga lakluhna tur an neih loh avangin school zirlai maktaduai chuangte chu exam hmachhawn thei loin an awm mek tih official-te chuan an sawi.

Education lama thuneitute chuan vawiin aṭanga ṭan tur, term test neih tur chu paper indaih lohna avangin tiam chin awm loin sawn hlat a ni rih tih an sawi.

Sri Lanka hian kum 1948-a zalenna an chan hnua sum lama indaih lohna nasat ber ṭum an tawng mek a ni.

"Rampawn aṭanga paper leh ink mamawh angte lakluh theih a nih loh vangin school principal-te chuan test hi an buatsaih thei lo a ni," tiin education department chuan a sawi. Test hun sawn hian an rama zirlai maktaduai 4.5 zinga hmun thuma ṭhena hmun hnih vel a nghawng dawn tih official-te chuan an sawi bawk.

Sum lama harsatna tawk mek, Sri Lanka hian an leiba nasa tak neih mek laka inkhaichhuahna tur chu International Monetary Fund (IMF)-ah an ngen dawn tih an sawi. IMF pawh hian President Gotabaya Rajpaksa-a'n sum puk a dilna chu ngaihtuah sak an tum tih a lo sawichiang tawh bawk a ni.

Kumin kumtir lamah khan China chu a leiba rulhna kawngah pui turin Sri Lanka hian a lo ngen tawh a, mahse China lam hian official-a chhanna engmah a la pe lo a ni.