Interpol hotu atan Kim Jong Yang thlang

International Criminal Police Organization, Interpol chuan an president thar atan South Korea mi Kim Jong Yang a thlang.

Interpol chuan an hotu thar atana Kim Jong Yang thlan a nih thu hi an pawl twitter-ah an tarlang a ni.

Kim hi Interpol acting president ni lai a ni a, Dubai-a annual Congress neihah member 194 awmna president atan hian thlan a ni ta a ni.

Kim Jong Yang hian kum 1961, October 30-a piang niin, kum 1992 khan South Korea police a zawm a, Geyonggi province-ah police hotu niin kum 2015 khan Interpol-ah vice president a ni. Mi chak tak, a thil tum tihhlawhtlin tum mi a nih avanign Korea mipui tam takin an duh hle niin Hannam University-a department of police administration professor Lee Chang-Hoon chuan a sawi.

Agency hrang hrangte inkarah thawhhona ṭha zawk a siam a, a bikin transnational cybercrime lam a ngaih pawimawh a rin thu a sawi. South Korea Police hotu a nih lai hian Kim hian ram dangte thawhpuina kawngah hma a la nasa hle a, sum leh training programme hmangin ramdang te an pui foa ni.

Kum 2015 khan Interpol vice president of Asia atan Kim hi thlan tlin a ni a, kumina Interpol President Meng Hongwei man a nih hnu khan acting president-ah dah zui a ni.

Meng Howei thlaktu atan hian Russian interior ministry official Alexander Prokopchuk chu dah tura rin kai ber a nih laiin, Dubai-ah annual meeting-ah Kim chu Meng-a term la hman zawh loh, kum hnih la awm chu chelh chhunzawm tura thlan a ni ta a ni.