SKorea pastor thiam loh chantir

South Korea pastor Lee Jae-rock chu a kohhrana hmeichhe pariat pawngsuala puhna thubuaiah thiam loh chantir a ni a, kum 15 tang turin hrem a ni.

Kum 75 mi, Lee Jae-rock hi Seoul-ah Mamin Central Church dinin, a kohhranah hian member 130,000 zet an awm a ni.

Pawngsual tawktute chuan pastor hian thuneihna mak tak a nei tih sawiin, Pathian anga an ngaih vangin a duh ang chuan an awm mai niin an sawi.

Pastor Lee-a kohhran hi mainstream Kristian organisation aṭanga peng a ni a, kum 1982-ah zuitu 12 chauh nei chunga a din a ni. Mahse a kohhran hi a ṭhang chak hle a, headquarters lian tak leh auditorium pawh an nei tawh a, an website-ah chuan thil mak tak tak thlentir an tiamna thute an tarlang ṭhin.

Kumin kumtir lam khan amah zuitu mi pathum chuan Pastor Lee hian a chenna inah koin mipat hmeichhiatna a hman luihpui niin an sawi. Pastor hi lal aia ropui, Pathian a nih avangin ti tura a tihte chu an hnial thei lo tih an sawi. Hemi hnu hian midang pawhin pawngsual an nih thu sawi chhuak ve lehin pastorin a pawngsual nia insawi hi mi pariat an ni. May thla khan pastor Lee hi man a ni.