Khashoggi case: France-in Saudi official 18 hrek dawn

France foreign ministry chuan October thlaa Istanbul, Turkey-a Saudi journalist Jamal Khashoggi thahna thubuai kal zelah Saudi mi 18 te hrekna a siam dawn tih a sawi.

Ministry chuan thuchhuah siamin, Khashoggi thah a nih dan chhuinaah pawikhawihna thlenga inhnamhnawihna neia sawi mi 18-te hi hrek a ni dawn tih sawiin, an ram bakah Europe-a Schegen area-ah an an kal a khap dawn tih a sawi.

Saudi Arabia pawhin tualthahna thlenga inhnamhnawihna nei a puh mi 21 hren mek an nih thu leh, an zinga mi panga lakah thi tura hremna pek an phut thu a sawi.

Khashoggi thahnaa mawhphurtute zawngchhuak a, an phu ang hremna pe ngei turin ram hrang hrangten Saudi Arabia hi an nawr reng a ni. Tunhnaia CIA zirchianna put ruah he tualthahnaah hian Saudi Crown Prince Mohammed pawh inhnamhnawihna neia ringhlelh a ni a, mahse Saudi prosecutor-te chuan inrawlhna a neih loh thu an sawi thung.

US Treasury chuan Saudi mi 17 te hrekna a lo siam tawh bawk a, an zingah hian Prince Mohammed-a thawhpui hnai tak takte pawh an tel.