Ukraine-in Russia kuta Mariupol pek a tum lo

Russia sipaiten Mariupol port city an kuta hlan tura an ngenna chu Ukraine chuan a hnawl. Hetih lai hian Russia sipaiten an beih chhunzawm zel avangin he khawpuia chengte hi eng, ei leh in tur an tlachham chho ṭan tawh a ni.

Ukraine deputy prime minister Iryna Vereshchuk chuan Russia sipaite kutah Mariupol chu an pe dawn lo tih sawiin, "Kan ralthuamte nena inpek tumna kan nei lo a, hei hi Russia lam pawh kan hrilh tawh bawk a ni," a ti.

Ukraine chhimchhak lama awm, Mariupol hi lawng chawlh hmun pawimawh tak a ni a, khawpuia cheng zinga a tam zawk hi Russia ṭawng hmang an ni. Russia-in Ukraine a run hnuah Mariupol khawpui hi an bitum nasat zingah a tel a, he khawpui hi an la thei a nih chuan kum 2014-a Ukraine kut aṭanga an lo chhuhsak tawh, Crimea bial nen khawmual lama inkalpawh theihna a awm dawn a, hei hi Russia sipaite tan a ṭangkai dawn hle a ni.

Russia hian nimin zing dar 5 thleng khan Mariupol pe turin hun an siamsak a, an pe thei lo a nih chuan hremna na zawk an hmachhawn tur thu an sawi.

Hetih lai hian Ukraine president Volodymyr Zelenskyy chuan Russia nena inbiakna neih a duh thu sawiin, remna zawnga inbiakna neih thuai chu Russia tihsual avanga a thil tihchhiat tur tihnep theihna kawng awmchhun a ni tih a sawi a ni.

February 24-a Russia-in Ukraine a run aṭangin, Ukraine mi maktaduai 10 vel chu himna zawngin an tlanchhe tawh a, hei hi an ram mipui hmun lia ṭhena hmun khat aiin an tam tawh zawk a ni. An zinga maktaduai 3.3 vel chu ram dangah an tlanchhia a ni.