China-in Covid darh zel karah mi mtd chuang kharkhip nawn leh

China chuan kum hnih chhunga Covid-19 hri leng nasa ber an tuar mek avangin, Pathianni khan ramchhunga mi maktaduai chuang lakah mahni in chhuahsan lo tura thupek, stay-at-home order a tichhuak leh.

China hian kum 2020-a Covid-19 hri len tirh aṭangin an khuahkhirh hneh hle a, hmun thlan bika inkharkhip, mass testing leh zin veivah khuahkhirhnate an siam nghal a ni. Mahse an invennate hi Omicron variant chuan rawn tichhiain, khawpui hrang hrangah hri hi a darh chho mek a ni.

Jilin province-a khawpui lian ber dawttu, mi maktaduai 4.5 chenna chu nizan aṭang khan ni thum chhung atan an inkharkhip dawn. Province khawpui, Changchun pawh ni thum chhung an inkharkhip dawn bawk. March 11 aṭang khan Changchun khawpuia cheng, mi maktaduai kua-te chu ni hnih danah chauh ei tur leh mamawh lei tura an chhuah phalsak an ni tawh.

Pathianni khan China-ah hian hri kai thar 4,000 chuang an awm a, an zinga hmun thuma ṭhena hmun hnih Jilin province ami an ni. Jilin province leh Russia leh North Korea nen an inri a ni. Jilin province-ah hian temporary hospital pariat leh quarantine centre pahnih siam thar a ni tawh bawk.

Inrinni liam ta khan kum khat chuang hnuah China-ah hian Covid vanga thi mi pahnih an awm.

Beijing khawpui hmar lam, Tangshan chuan Pathianni khan darkar 24 chhung chu hri leng darh tur venna atan traffic chu che thei loin an khuahkhirh bakah khawpuia cheng mi mtd 7.7 te chu test neihsak an ni vek dawn bawk a ni.