Mexico official-ten US border deal pawmpui lo

US-in central America aṭanga an rama pemluh tumten sorkar hnena luh phalna an dil chhunga Mexico rama lo nghah tir tura inremna siampui a tum chu Mexico thuneitute chuan an pawm lo a, inbiakna la neih mek a ni tih an sawi.

Media report ṭhenkhat leh US President Donald Trump-a twitter-ah chuan US leh Mexico hian pemluh tumte lo awm lailawk tir tur hian inremna an siam nia tarlan a ni a, mahse hei hi Mexico official-te chuan chhangin, inremna an la siam lo tih an sawi a ni.

Kar kalta Inrinni khan President Trump chuan a twitter-ah, US-a pemluh tumte chu an dilnate court-in a pawm phawt loh chuan US-a luh an remti dawn lo a, Mexico-ah an la awm chhunzawm rih dawn niin a sawi. Mahse Mexico foreign minister thar tur Marcelo Ebrad chuan inremna hi an la siam lo a, inbiakna erawh neih chhunzawm mek a ni tih a sawi.

Central America aṭanga US-a pemluh tuma a ruala kal, mi sang tel chu km 4,000 chuang zet an kal hnuah US-Mexico border an thleng tawh a, an zingah hian hmeichhia leh naupang pawh eng emaw zat an tel. Heng mite hi Honduras, Guatemala leh El Salvador ram aṭanga kal an ni a, an rama tihduhdahna thleng te, retheihna nasa lutuk leh tharum thawhna thlengte tlansan an nih thu an sawi a ni. Tam tak chu ramri bul khua, Tijuana-ah an awm lailawkna siamsak an ni a, US leh Mexico-ten inremna an siam theih loh chuan ramri hian thla eng emaw zat an tan mai a hlauhthawnawm hle nia sawi a ni.

Trump chuan danloa ramri kana an ram luh tumte chu lo dan an tum tih sawiin, ramri veng tur hian sipai pawh 5,800 vel a tirh belh tawh bawk.