Zimbabwe President hlui Mugabe dinhmu ṭha lo

Zimbabwe President hlui Robert Mugabe, kum 94 mi chu a hriselna a ṭha tawh lo hle a, kal pawh a kal thei tawh lo niin President Emmerson Mnangagwa chuan a sawi.

Mugabe hi thla hnih kalta chhung khan Singapore-ah enkawl a ni a, mahse a natna tak erawh puanzar a ni lo. President a nih lai pawh khan Singapore-ah hian inentir turin a lo kal fo tawh a ni.

Kum khat liamtaa sipai chakna hmanga Mugabe thuneihna paihthlaksak a nih hnuah, Mnangagwa hi president atan dah a ni a, nikuma inthlanna neihah thlan tlin a ni leh a ni. Mugabe hian kum 37 chhung zet Zimbabwe-ah ro a rel a, a tirah prime minister niin, president a ni zui leh bawk a ni. Mingo te rorelna aṭanga Zimbabwe zalenna tura hmalaknaah pawh a hruaitu a ni bawk.

President Mnangagwa chuan rally a neihnaa thu a sawiah Mugabe chungchang hi a sawichhuak a, a kum upa tawhin a chak tawh lo hle a, a mamawh leh a duh ang a sawite chu sorkar chuan a ngaihtuahsak zel tur thu a sawi. Mugabe chu Zimbabwe hnam pa a ni a, an enkawl zel dawn tih a sawi. Mugabe inenkawlna senso hi sorkarin a tum vek a ni.