Israel-in UN global migration pact pawm ve lo

Israel chuan United Nations-in pem lutte chungchanga inremna a siam, UN Global Compact for Migration chu a pawm ve lo. Austria, Hungary leh United States pawhin he inremna pawm an tumna chu an sut leh tawh bawk.

Israel Prime Minister Benjamin Netanyahu chuan UN migration pact hi an pawm ve dawn lo tih sawiin, document mumal nei loa an rama luh tumte lakah an ramri chu an veng chhunzawm zel dawn tih a sawi a ni.

"Kan chhehvel bialah kan ram chu pem lut hoin an pan nasa hle. Ram hrang hrang aṭanga pemlut tam hian Israel khawpui ṭhenkhat nunphung thlengin a thlak danglam a ni. He inremna siam hi zawm a, inremnain a phut anga thil ti leh theih lo dinhmuna awm hi kan duh lo a ni. Hei vang hian prime minister pawhin kan ram dinhmun thlirin he inremna hi zawm ve loh mai a titlu ta a ni", tiin Knesset Speaker Yuli-Yoel Edelstein chuan a sawi.

Global Compact for Migration hi December 10-11 chhunga Morroco-a Marrakesh khawpuia intergovernmental conference neihah tihfel tum a ni. He inremna duanah hian local, national, regional leh global level-a pemlutte enkawlna ṭha zawk pekna tur ruahmanna 23 siam a ni.