Zelenskyy-a'n Russia laka hma la ngam loah NATO puh

Ukraine president Volodymyr Zelenskyy chuan Thawhṭanni khan Russia sipaite nena an indo mekah North Atlantic Treaty Organization (NATO) chu Russia hlauah puhin, an rama Russia hmalakna do zawnga chechhuak ngam loah a puh.

"NATO chuan min pawm a nih chuan sawi mai se, a nih loh pawhin Russia an hlauh avanga min lalut thei lo a nih pawhin chiang takin sawi mai rawh se, hei hi thudik a ni," tia President Zelenskyy thusawi hi Kyiv Independent chuan a tarlang.

President Zelenskyy chuan, "NATO member ramte chuan NATO-ah kan tel ve kher loh pawhin venhimna min pe thei sela tia kan pawm a ngai tawh a ni. Hei hi indo tawp theihna tur pawh a ni," a ti.

Ukraine-in NATO member nih a dilna hi Russia president Vladimir Putin-a'n Ukraine do tura thutlukna a siam chhan berah mithiamte chuan an ngai a ni. Mahse, tunhnai khan Zelenskyy chuan an ramin NATO member nih an dilna chu thamral tawhah a ngai tih a sawichhuak. "NATO hian min pawm thei lo tih ka hriat hnuah NATO zawm chungchang chu ka ngaihven tawh lo. Ṭangrual ram hi thil harsa hmachhawn an hlauh a, Russia nena inbeih hi an hlau a ni," tiin tun thla tir lam khan Zelenskyy hian a lo sawi tawh bawk.

Tun hnaia Suspilne-in an kawmnaah, Zelenskyy chuan Russia-in Mariupol hlan tura an ngenna chu an tihhlawhtlin sak theih loh thu sawiin,"An thil duh hi kan tihlawhtling thei lo. Kan mite an thah hnuah engtin nge kan tih theih ang? A theih loh hulhual a ni," a ti.

Russia-in Ukraine khawpui a lak theih dan awmchhun chu mi zawng zawng thah chimit vek a nih thu Zelenskyy chuan a sawi. "Kharkiv emaw Mariupol emaw Kyiv emaw pawh an kuta hlan turin min phut mah se, mipuiten an remti dawn lo a ni. Russia chuan khawpui ruak chiah an la thei ang," a ti.

Russia chuan February 24 khan Ukraine hi an run ṭan a, he indona kalpui tura thupetu, president Vladimir Putin chuan indona hi ‘special military operation’ tih a vuah thung.