Covid-19 variant thar lakah US mipuite fimkhur turin chah

United States-a mithiamte chuan hun rei lo teah US-ah Omicron subvariant thar vangin US-ah Covid-19 hri kai an pung chho leh hluai thei nia sawiin, mipuite fimkhur turin an chah.

U.S. Centers for Disease Control and Prevention (CDC) data chuan Omicron subvariant thar, BA.2 tia hriat hi inkaichhawn awlsam tak, a hri kai pawh kartin a leta pung thei a ni tih a sawi.

March 12 chawlhkarah khan US-a hri kai thar zingah BA.2 kai hi 23.1% an tling a, February 26 chawlhkarah khan 7.1% awmin, February 5 karah khan 1% chauh an la awm. CDC data aṭang hian BA.2 kai hi an pung chho chak hle tih a hriat theih a ni.

Hetih lai hian US ram chhunga hri kai thar tam ber chu Omicron variant kai an la ni a, mahse March 12 karah khan 66.1% in a tlahniam tawh a ni.

Infectious disease expert, Anthony Fauci chuan BA.2 vanga hri kai an pun a rin thu sawiin, variant dang ang em erawh chuan hri kai thar hi an tam a rin loh thu a sawi. Fauci chuan Omicron hmasa zawk ai khan 50-60% velin inkaichhawn a awlsam zawk a, hei vang tak hian United States-a strain darhzau ber a nih theih thu Pathianni khan a sawi. Hemi rual hian he strain hian taksa lama harsatna lian tham a thlen a rinawm loh thu leh, a hmaa hri lo kai tawh leh vaccine lo lak tawhah chuan nghawng a neih vak loh a rinawm thu a sawi.

U.S. surgeon general Vivek Murthy pawhin variant thar vang hian hri kai an pun theih thu sawi mah se, kum hnih liamta chhung zawng ai khan ramchhung dinhmun chu a ṭha tawh zawk thu a sawi bawk.

Europe ram ṭhenkhat - Finland, France, Germany, Netherlands leh United Kingdom-ah chuan hun eng emaw chen chu Covid-19 kai hmuhchhuah an pung vek a ni. Hetiang karah hian health official-te chuan Covid-19 vaccine leh booster lakte chu hri vanga dinhmun ngaihtuahawma awm tur vengtu ṭha ber a nih thu an la sawi reng a ni.

CDC data-a tarlan danin, March 16 thleng khan US-a cheng zinga mi maktaduai 76.7-te chuan Covid-19 vaccine dose khatna an la tawh a, 65.3% te'n dose bikimin an la tawh bawk a ni. Hetihlai hian, ramchhunga booster la thei chin zinga a zahve vel chauhin booster dose hi an la a ni.