Russia-in Facebook leh Instagram khap

Russia khawpui, Moscow-a court chuan Thawhṭanni khan Meta Platform hnuaia social networking site pahnih, Facebook leh Instagram chu an chetdan uchuak tak avangin Russia ram chhunga hman khapna a tichhuak.

Prosecutor General's Office of Russia chuan Russia dikna an palzut sak avanga an chungchang hi ngaihtuah an nih thu a sawi.

Meta hian anmahni dan siam ngei chu bawhchhiain, ṭawngkam dengkhawng tak tak post an phalsak bakah Russia-a special military operation chungchanga thudik lo post 4,500 chuang la thla tura an ngenna chu an hnawlsak a, hei bakah an platform kaltlang hian phalna nei loa punkhawmna te huaihawt a nih thu prosecutor chuan a sawi.

Court thutlukna hi hman nghal tur ni mah se he khapna hian WhatsApp messenger erawh a huam tel dawn lo thung a ni.

Prosecutor General Office leh Russia Federal Security Service chuan Meta hi Russia leh a sipaite do zawng hmalakna a kalpui avangin Russia-ah sumdawnna lam thil a kalpui an remti lo bawk.