Taliban-ten hmeichhiate school kal phalsak leh lo

Afghanistan-a rorel lai, Taliban-te chuan high school zirlai hmeichhiate tan school hawn a ni tawh dawn tih a puan hnuah, a thupuan hi sut lehin Islamic law zulzuia ruahmanna siam a nih leh hma chuan hmeichhiate chu school kal phalsak an ni dawn rih lo tih a sawi leh.

Thupek an lo tihchhuah tawh angin nimin khan Afghanistan khawpui, Kabul-ah chuan high school zirlai hmeichhiate chu school an kal hlawm a, mahse school campus an thlen hian in lama haw tura hriattir an ni a, zirlaite hi mittui nen in lamah an kir leh hlawm a ni.

Taliban-te hian thuneihna an chan hmasak ṭum, kum 1996-2001 inkar khan hmeichhiate lehkha zir leh, pawn lama hna an thawh hi an lo khapsak tawh bawk.

Nikum August thlaa Taliban-ten Afghanistan-a civil sorkar paihthla a, thuneihna an chan aṭang khan hmeichhiate school kal hi an khap sak a, mahse kar liam ta khan Ministry of Education chuan nimin, March 23 aṭang khan high school zirlai hmeichhiate chu school kal chhunzawm phalsak an ni tawh dawn tih a puang. Thawhlehni zan khan ministry thupuangtu chuan zirlai an chhunzawm theih dawn tak avang hian zirlai hmeichhiate a lawmpuina thu pawh a tichhuak a, mahse nimin zing khan thupek thar siam anih leh hma chuan hmeichhiate tan school khar a la ni dawn tih ministry chuan a tichhuak leh nghal a ni.