WHO-in Europe ramte Covid khuahkhirhna hlih a sawisel

World Health Organisation (WHO) chuan Covid-19 hri kai an pun chhoh mek laia Europe ram ṭhenkhatten Covid khuahkhirhna an hlip hma lutuk chu a sawisel.

Modova-a news conference a neihah, WHO Europe director Hans Kluge chuan Europe rama hri leng mek chungchanga sawiin, mipuite chu fimkhur turin a chah. Europe-a region 53 zingah 18-ah hri kai an pung chho leh mek a ni. "Hri kai punna zingah hian United Kingdom, Ireland, Greece, Cyprus, France, Italy leh Germany an tel a ni," tiin, hemi karah hian heng ramte hian khuahkhirhna siamte chu an hlip hmain an hlip nasa nghal lutuk niin a sawi.

WHO data aṭanga a lan danin, January thla tawp lama hri lengin a 'peak' a thlen hnuah Europe-ah hian hri kai thar hi nasa takin an tlahniam a, mahse March thla tir lam aṭangin an pung chho leh a ni. Ni sarih liam ta chhung khan European region-ah hri kai thar maktaduai 5.1 chuang awm lehin, thihpui 12,496 an awm belh leh bawk a ni.

France ramah chuan sorkarin Covid khuahkhirhna siam tam zawk a hlip a, mahse hemi hnu kar liam ta khan hri kai hi a let thum velin an pung a ni. Germany pawhin ni khatah hri kai thar nuai thum dawnte an awm hnuah pawh khuahkhirhna siamte tihtawp a remti. Italy sorkar chuan hri kai pung zel mah se May 1-ah chuan khuahkhirhna siamte chu hlih fel deuh vek a ni tawh dawn tih a sawi bawk. UK-ah chuan mi 20-ah mi pakhatin hri kai zel ang an ni mek chungin, kar liamta kartawp aṭang khan sorkar chuan internatonal travel restriction a siamte a titawp tawh bawk. Hetih lai hian Austria chuan kar liamtaa face mask vuahna thupek a tihtawp tawh chu hri kai an pun leh avangin pawn chhuahnaa face mask hmanna tur thupek a tichhuak thar leh thung.