Russia eptu hruaitu kum 9 tang turin hremna pek belh

Russia court chuan eptu hruaitu, jail-a tang mek Alexey Navalny chu kum kua dang tang turin hremna a pek belh leh.

President Vladimir Putin leh a kaihhruai sorkar sawisel ṭhintu, Navalny hi jail-ah kum hnih leh a chanve a tang tawh a ni. Thawhlehni khan a thubuai dang, a foundation dinin sum a dawnte tichingpen leh, a thubuai hmasa ngaihtuah a nih laia judge zah loha puhna thubuai siamtharah thiam loh chantir leh a ni. Kum kua tang tura hrem a nih bakah Navalny hi rouble maktaduai 1.2 (USD 11,500) chawi tura tih a ni bawk. Navalny chuan an puhnate hi phain, politics vanag an beihna niin a puh thung.

He thubuai hi thla khat vel an ngaihtuah a, a ngaihtuahna hmun pawh hi Moscow court aṭangin Navalny awmna tanin-a courtroom siam lailawkah sawn a ni. Hei hi Navalny thlawptu lam chuan an sawisel a, thubuai ngaihtuahnaah hian media mite leh Navalny thlawptute pawh an kal thei lo niin an sawi.

Kum 45 mi, Navalny hi kum 2021 January thla khan tura hrai a nih avanga Germany-a thla nga a inenkawl hnua Russia rama a kir chu airport-ah lo man nghal a ni. Man a nih hnuah sorkar lam chuan Navalny thurualpui leh thlawptute an vai nghal a, a thawhpui hnai tak takte chu thubuai eng emaw zat siamsak an nih avangin Russia aṭangin an tlanchhe hlawm a ni. Eirukna dona atana foundation a din pawh dan pawnah hnawl a ni bawk.