US ramri kaltlang luih tum- te Mexico in thawn kir dawn

Mexico chuan an ram aṭanga US ramri kaltlang luih tum mi 500, Central America aṭanga kalte chu an ram lamah thawn kir a tum.

Pathianni khan heng mite hian tharum leh dan kalhin Tijuana khaw bula US ramri hi kaltlang luih an tum a, heng mite hi US border officer-te chuan tear gas hmangin an lo dang a ni.

Mexico interior ministry chuan thuchhuah siamin, tharum hmanga ramri paltlang luih tumte hi rang takin an ram lamah thawnkir an ni dawn tih an sawi a, an zingah hian hmeichhia leh naupangte pawh an tel a ni. Ministry chuan US-a pemluh tumte thiltih dan chu dan kalh a ni tih sawiin, ṭanpui an tum dan kawng nen a inmil lo a, thil ṭha lo zawk a thlen phah a hlauhawm niin a sawi.

Central America aṭanga US-a pem luh tuma a ruala kalte hian km 4,000 chuang an kal hnuah tun thla tir lam khan US ramri bula Mexico khua Tijuana an thleng a ni. Mahse US sorkar chuan pem luh tumte luh dilna chu court-in a enfiah a, a remtihsak hma chuan luh a remti dawn lo tih a sawi a, hei vang hian ramri-ah vengtu sipai pawh a dah belh a ni. Pemluh tumte dilna ngaihtuah nan hian thla eng emaw zat hun hman pawh a ngai maithei nia sawi a ni.

Mexico Home Secretary Afonso Navarrete chuan US-a pemluh tumte hian kawngzawh huaihawt turin puihna an dil a, hetihlai hian an hruaitu zinga ṭhenkhat chuan mipuite chu fuihin, group hrang hranga inṭhendarh a, ramri kana US lama tlanlut turin an lo fuih niin a sawi. Heng mite chetdan hian Mexico sorkar a tilawm lo hle a, ramri kan luih tumnaa telte hi an ram lamah thawnkir an ni dawn tih a sawi a, an thiltih hian pem luh tuma ramri bula inkulh mekte dinhmun pawh a tihderthawn phah thei nia sawi a ni bawk.