EU hruaituten Brexit deal pawm

European Union hruaitute chuan Pathianni-a Brussels-a summit neihah EU aṭanga Britian inlakhranna tur, Brexit deal chu an pawmpui. Hemi rual hian Britain Prime Minister Theresa May-i chu thlawp turin British mipuite an sawm nghal bawk.

Kum khat leh a chanve chuang zet inbiakna an neih hnuah, EU hruaitu 27-te chuan nakkum March 29 aṭanga EU aṭanga UK inlakhranna tur inremna siam, phek 600 zeta chhah leh insumdawn tawnna chungchanga ruahmanna siam phek 26 chu an pawmsak ta a ni.

European Council President Donald Tusk chuan Brexit deal an pawm thu hi a puang a, "EU27 chuan EU-UK chungchanga Withdrawal Agreement leh Political Declaration chu an pawm ta" tiin a sawi. EU chief negotiator Michel Barnier chuan EU-UK inṭhenna tura a thawh khatna chu an zo ta tih sawiin, an thawhdun zel dan tur ngaihtuah chhoh a ngai dawn ta tih a sawi. "Ṭhianṭha leh thawkdun ṭha tak kan ni zel dawn a, tunah chuan mitinin an mawhphurhna an hlen chhoh a ngai dawn ta a ni", a ti.

European Commission president Jean-Claude Juncker chuan EU-UK inṭhenna tura inremna ziahfel a ni ta chu lungchhiat thlak hle tih a sawi a, hemi rual hian Britain PM May-in he inremna an ram Parliament pawmpuina tura a put luh tur chu an thlawp thu a sawi bawk. British parliament pawhin an pawmsak ngei a beisei thu a sawi a, "He inremna siam hi Britain tana thil ṭha ber a nih avangin kei pawhin a thlawp lamah ka vote ngei ang", tiin a sawi.

Brexit deal chungchang hi Britain Parliament-ah thla thar hian ngaihtuah a ni ve leh dawn a, eptu party member bakah PM May-i cabinet member zingah he inremna siam dan hi sawisel leh duh lo an awm avangin May-i tan pawh a hautak hle rin a ni. May-i chuan he inremna siam hi UK tana thil ṭha a nih thu sawiin, an ram mipuite hnenah pawh thlawp turin a ngen a ni.