Ukraine-a hospital 64 beih tel a ni tawh - WHO
World Health Organisation (WHO) chuan thla khat liam ta aṭanga Russia-in Ukraine a run hnuah, Ukraine ram chhunga healthcare facility 64 chu beih tel a ni tawh tih a sawi.
WHO chuan thuchhuah siamin, Russia-in Ukrain a run ṭan ni, February 24 aṭanga March 21 inkarah khan heng healthcare facility-te hi beih an ni tih sawiin, mi 15 an thi tel bawk tih a tarlang.
"Healthcare facility beih hi international humanitarian law bawhchhiatna lian tak a ni. Mahse indona hmunah hetiang thil pawi tak hi a thleng fo a, infractructure pawimawh tak tihchhiat a ni ringawt lo a, a aia pawi zawk chu mi tam tak beiseina an tihchhiat sak a ni," tiin Ukraine-a WHO representative Dr Jarno Habicht chuan a sawi. Eng dinhmunah pawh healthcare facility chu beih tel a ni ngai tur a ni lo, a ti.
Ukraine sorkar chuan Russia chu Mariupol khawpuia naupang hospital leh health facility dangte bomb-ah a lo puh tawh bawk a ni.
UN chuan Russia-in a run avangin Ukraine aṭangin mi maktaduai li vel an tlanchhe tawh tih a sawi a; Kharkiv, Kyiv leh Mariupol-te chu Russia sipaiten an la bomb chhunzawm reng a ni.
Kar li zet Russia-in a beih tawh avangin inbeihna hmuna awm leh, Russia sipaiten an luahsak tawh hmuna awm health facilty 1,000 dawn chu khar a ni tawh a, hei hian dam lo enkawlna kawngah pawh nghawng a nei nasa tawh hle a ni, tiin WHO chuan a sawi.
Ukraine ram chhunga damdawi zawrhna dawr zahve vel chu khar a ni tawh bawk a, healthcare worker tam tak chu indona avangin an tlanchhia a, ṭhenkhat chu hna thawk chhunzawm thei loin an awm bawk.
Indona avang hian Covid-19 vaccine pek chhuah hna kalpui pawh chawlhsan a ni. Indona thlen hma hian nitin mi 50,000 vel hnenah vaccine hi pek ṭhin a ni a, mahse February 24 leh March 15 inkarah khan vaccine hi mi 1,75,000 vel chauhin an la a ni.
WHO chuan indona avanga damdawi leh a hmanrua lama Ukraine-in harsatna a tawh mek pui turin Ukraine ministry of health chu an thawhpui reng thu leh, health facility hrang hranga pek tur damdawi leh a hmanrua metric ton 100 chuang a thawn tawh thu a sawi. Hei bakah hian Kyiv khawpui panin damdawi, metric ton 36 thawn mek a ni a, a bak metric ton 108 pawh thawn tura buaipui mek a ni, a ti. WHO hian Ukraine-ah emergency medical team 20 chuang a tir a, Poland leh Moldova rama tlanchhiate puitu tur a dah bawk.