Russia ramah thil man a sang chak

Russia-in Ukraine a run avanga khawthlang ram hrang hrangten hrekna an siam avangin Russia ramah thil man a sang chak hle.

Russia pawisa hlutna tlahniamin, nitin khawsakna man erawh a sang chak hle. Kar liam ta khan thil man sanna hi 14.5% vel ni tawhin, hei hi kum 2015 hnuah a san lai ber a ni.

Kuminah Russia pawisa hlutna hi 22% in a tlahniam hman tawh a, hei hian ram pawn lam aṭanga an thil lakluh thlengin a nghawng.

Federal State Statistics Service chuan chini man pawh bial ṭhenkhatah chuan 37.1% in a pung tawh tih a sawi. Purun sen mah pawh an ram pumah 13.7% a pungin, hmun ṭhenkhat chuan a punna hi 40.4% a tling. Black tea man pawh chu 4% leh toilet paper man pawh 3% in an pung tawh bawk.

UK, US leh European Union chuan Russia bank eng emaw zat chu an hrek tawh a, hei bakah Russia central bank thawhpuite an khap bawk. Ukraine aṭangin khawtlang lam sumdawng lian tam tak an inlachhuak tawh bawk a ni. Hetih lai hian Russia chuan an ram chhunga sumdawnna titawp company-te chu Russia rama an thil neihte laksakah a vau let thung.