North Korea-in ICBM kap chhuak

North Korea chuan nimin khan intercontinental ballistic missile (ICBM) nia hriat chu a ram khawchhak lam tuipuiah a kap chhuak niin South Korea leh Japan chuan an sawi. Hei hi NKorea-in kum nga hnua ICBM a enchhin lehna hmasa ber leh, kumin chhunga missile a enchhin ṭum 11-na nia sawi a ni.

South Korea Joint Chiefs of Staff chuan nimin zing khan NKorea aṭanga long range missile nia hriat kahchhuah a nih thu hi a sawi a, ICBM ni ngeiin an ngaih a ni. NKorea thiltih chhang letin an sipaite chuan khawmual, tuipui leh boruak aṭangin missile an kap ve nghal niin a sawi bawk.

Japan sorkar pawhin NKorea thil kahchhuah hi ballistic missile ni ngeia a lan thu a sawi ve bawk a ni.

SKorea president Moon Jae-in chuan thuchhuah siam nghalin, "Chairman Kim Jong-un-a'n intercontinental ballistic missile kahchhuah tawh loh a intiamna chu an bawhchhia a ni," tiin he thil hi Korean peninsula bakah ram dang tan pawha thil hlauhthawnawm tak a nih thu a sawi a, UN Security Council resolution palzutna chiang tak a ni, a ti.

March 16 khan North Korea hian missile ni ngeia hriat chu a lo enchhin tawh bawk a, mahse kahchhuah a nih hnu lawkah an khawpui Pyongyang khaw chungah a puak niin South Korea sipaite chuan an sawi.