Pakistan PM rin tawk lohna motion pulut ; March 28-ah Parliament-ah fiah a ni dawn

Pakistan-a eptu party-te chuan an ram prime minister Imran Khan rin tawk lohna motion an pu lut a, mahse nimina Parliament inkhawmah ngaihtuah hman a ni lo. Kar leh Thawhṭanni, March 28-ah PM Khan hi fiah a ni ang.

Pakistan Prime Minister ni tawh zing hian office full term, kum nga hmang zo an la awm lo.

Rintawk lohna motion put luh a nih hma hian eptu pawl hian PM Khan chu banna thehlut mai turin an ti a, mahse Khan chuan hnialin eng pawh tawk dawn se banna lo thehluh hmasak a tum lo leh, bei let loa a tlawm nghal mai dawn loh thu a sawi.

Member 342 awmna, Pakistan National Assembly-ah hian PM Khan hian majority nei tur chuan member 172 thlawpna neih a ngai a ni. Prime Minister Imran Khan-a party, Pakistan Tehreek-e-Insaf (PTI) hian member 155 neiin, PTI kaihhruai ṭangrual sorkarah hian member 179 a nei a ni.

Hetih lai hian ṭangrual sorkar tel party pathum chuan PM rin tawk lohna motion-ah hian eptu lam an thlawp dawn tih an sawi. Eptu lamah hian member 163 awmin, ṭangrual sorkar thlawptu ṭhenkhatte an pawtpeng thei a nih chuan Imran Khan kaihhruai sorkar hi an paihthla thei dawn a ni.

Pakistan ram inthlanpui hi kum 2023 kumtawp lama neih tur a ni a, mahse interior minister Sheikh Rasheed Ahmed chuan ruahman aiin inthlanpui hi neih a ngai maithei tih a sawi.