NKorea-in ICBM lian ber a enchhin thu nemnghet

North Korea chuan international continental ballistic missile (ICBM) lian chu an ram hotu, Kim Jong-un thupek angin a enchhin tih nimin khan a nemnghet

South Korea leh Japan chuan Ningani khan NKorea hian ICBM a enchhin nia sawiin, hei hi kum 2017 hnua long-range test a neih lehna hmasa ber nia sawi a ni. Nimin khan NKorea official Korean Central News Agency chuan a rawn nemghet a ni.

KCNA chuan Hwasong-­­­­17 hi km 6,248 china sang leh km 1,090-a thui a thlawh hnu, minute 67 hnuah North Korea leh Japan inkar tuipuiah a tla tih a sawi. ICBM an enchhina chu an beisei anga a hlawhtlin thu leh, indo a thlen thlulah pawh rang taka hman theih a nih thu a tarlang.

Meter 25 (feet 82) vela sei, Hwasong-17 hi North Korea ralthuam neih zinga a sei ber a nih bakah, khawvel huap pawhin road-mobile ballistic missile system lian ber niin mi ṭhenkhat chuan an ngai. Kum 2020 October thlaa military parade an neih khan NKorea chuan he missile hi a rawn pho chhuak a, Ningani khan a enchhin ta a ni.