Afghanistan-a hmeichhe lehkha zir khapna sût turin ngen

Afghanistan-a rorellai, Taliban-ten zirlai hmeichhiate school kal a khapsakna tur sût turin US leh a thurualpui ram hrang hrang an ngen.

Canada, France, Italy, Norway, UK leh US foreign minister-te bakah EU High Representative chuan thuchhuah inṭawm siamin, Taliban-ten zirlai hmeichiate school kal phalsak an nih tur thu a sawi hnuah, March 23-ah a thu sut a, lehkha an zir chhunzawm a khapsak leh chu an dem takzet tih an sawi.

Thuchhuah an siamah hian, "Taliban-te chuan Afghan mipuite leh khawvel ram dangte hnena an intiamte chu a bawhchhia a ni," tiin hmeichhiate tana school kal khapna thupek an siam chu sut leh nghal turin an ngen a, an sut thuai loh chuan Aghan hmeichhiate lakah nghawng pawi tak a nei thei dawn a ni, an ti. He thil an tih hian Taliban-ten ram chhung leh ram pawn lama thlawptu an neih thlengin a ṭha lo zawngin nghawng dawn tih an sawi bawk.

"Afghan mipui tu pawh, mipa naupang leh hmeichhe naupang pawh, mipa leh hmeichhia tupawhin zirna chungchangah chuan eng level-ah pawh dikna chanvo in ang vek an nei a ni," an ti.

Nikum August thlaa civil sorkar thuneihna an hnehchhuh hnuah Taliban hian hmeichhiate school kal hi a khapsak nghal a ni. Afghanistan-a school year thar a inṭan leh tawh avangin mipate erawh a pangngaiin zirna an chhunzawm leh tawh a, mahse hmeichhiate erawh school kal phalsak an la ni ve lo.