Mexico-in Trump-a makpa chawimawina hlan dawn

Mexico sorkar chuan US President Donald Trump-a makpa, Jared Kushner chu an ramin ramdangin mi chawimawina sang a pek ṭhin, Order of the Aztec Eagle a hlan dawn tih a sawi a, hei hian social media lamah sawisel a tawk zui nasa nghal hle.

Jared Kushner hi President Trump-a hnuaiah White House senior adviser a ni a, August thlaa North American trade pact siam a nih theihna atana a thawhhlawk avangin he chawimawina hi hlan a ni dawn tih Mexico sorkar kalchhuak tur chuan thuchhuah siamin a tarlang.

Kushner-a hi Trump-a kaihhruai sorkarah palai hna pawimawh tak tak pawh thawhtir a ni a, kum 24 zeta upa North American Free Trade Agreement siamṭhat anih theihna tura puiin, Mexico leh ram dang hruaitute pawh a lo kawm tawh a, September thla tawp lam khan he inremna siam hi Canada pawhin a lo sawm tawh a ni.

Chawimawina hi vawiin hian Mexico president kalchhuak tur Enrique Pena Nieto-an Buenos Aires-a G-20 summit neih karlakah a hlan dawn a ni. He summit-ah hian Mexico, US leh Canada ram hruaitute chuan regional trade deal siamthar pawh an ziahfel beisei a ni bawk.

Order of the Aztec Eagle hlan tawh zingah hian Colombian Nobel literature laureate Gabriel Garcia Marquez leh South African President hlui Nelson Mandela te pawh an tel.

Mexico President atana thlan thar, Andres Manuel Lopez Obrador chu Inrinni hian lakluh a ni dawn a, president lakluh inkhawm hi Kushner-a nupui, Ivanka Trump pawhin a hmanpui dawn a, a ni bakah Vice President Mike Pence leh US official dangte pawh an tel ang.