US-in Nicaragua Vice President a hrek

US chuan Nicaragua Vice President Rosario Murillo chu eiru leh mihring dikna chanvo palzuta puhin a hrek ve leh. Rosario Murillo hi President Daniel Ortega nupui a ni.

Vice President hian sorkar dodaltu mipuite nghaisa leh rubo tura ṭhalai pawlte a fuih niin US chuan a sawi. US chuan President te nupa bakah hian an security adviser pawh a hrek tel bawk a ni.

Murillo leh a pasal Ortega hian kum sawm chuang Nicagarua-ah hian ro an rel dun tawh a ni.

US Treasury chuan US President Donald Trump thupek tihchhuah thar hmangin, Murillo-i chu Nicagarua democracy palzutah puhin hrekna hi siam a nih thu a sawi. President security adviser Nestor Moncada Lau pawh kumin kumtir lama sorkar laka lungawi lohna lantirte bei turin armed group te thu peah puh a ni bawk.

Hrekna siam hmang hian US thuneihna hnuaia an thil neihte khawih chet theih lohin dah sak an ni dawn a, US mi, bank leh pawl dangte pawhin an thawhpui khap a ni bawk.

Kumin April thla khan Nicagarua-ah hian eptute chuan social president Ortega ban phutin nawrh an huaihawt a, mahse President hian nawrh huaihawtte hi inbiakna neihpui duh loin security force-te a tir zawk a ni. Nawrh huaiawt leh security force-te innawr buainaah hian mi tam takin nunna an chan a ni. Eptu pawl activist Felix Maradiaga pawhin a nunna atana hlauhthawnawma vauna a tawh thu sawiin July thla khan an ram hi a lo chhuahsan tawh bawk.