Myanmar sipai hotuin 'firfiakte' inbiakna neihpui a tum lo

Myanmar sipai hotu lu ber, general Min Aung Hlaing chuan 'firfiakte' tia a sawi, sipai rorelna dodaltu pawlte chu inremna kawng zawnga inbiakna an neihpui dawn loh thu a sawi.

Nimin khan Myanmar sipaite hian an ram khawpui, Naypyitaw-ah Armed Forces Day hmangin, parade bakah ralthuamte an pholang a ni. Hei hi nikum February 1-a civil sorkar thuneihna an hnehchhuh hnua Armed Forces Day an lawm ṭum hnihna a ni.

Hetih lai hian nimin zing khan khawpui hrang hrangah sorkar rorelna duh lotu mipuite chu kawtthlerah kal chhuakin, sipai sorkar paihthlak an duhna thuziakte an keng.

Sipai hotu, Min Aung Hlaing chuan Armed Forces Day lawmnaa thu a sawiah, eptu pawl 'firfiakte' chu eng kawng maha inbiakna neihpui an tum lo tih a sawi. Firfiakte chu pawisawi lote thihnaa mawhphurtu nia sawiin, tihchhiat vek an tum tih a sawi.

Sipai sorkar hian sipai sorkar dodaltute chu civil leh security force-te thatah a puh a, hetih lai hian activist-te chuan civil sorkar an paihthlak hnuah sipaite hian civil mi tam tak an that tawh niin an sawi thung.

Civil sorkar aiawhtu atana Parliament member hluiten an din, National Unity Government (NUG) chuan Myanmar sipaite chuan sipaite leh anmahni thlawptute chu an la paihthla vek dawn tih a sawi. NUG thupuangtu Dr Sasa chuan, "Kan pasalṭha kan chan takte thlarau nena thawkin, a tawp thlengin kan bei let zel dawn a ni," a ti.

Rights group Assistance Association for Political Prisoners (AAPP) chuan sipai sorkar dodalna lantirtu zinga mi 1,700 chuang thah an ni tawh a, mi 13,000 dawn man an ni tawh bawk niin a sawi. Mahse sipai thuneitute lam chuan AAPP hian a sawi uar niin an puh let thung a ni.