Ukraine-in ralthuam pek belh turin khawthlang ramte a ngen

Ukraine presidnt Volodymyr Zelenskyy chuan an ram run mektu, Russia sipaite chuan fuel leh ei tur dahkhawlna hmunte a bitum mek tih a sawi a, khawthlang ramte hnenah an ram venhimna atan tank, thlawhtheihna leh missile-te pe turin a ngen.

Inrinni zana TV kaltlanga thu a sawiah, President Zelenskyy chuan khawthlang ramten an ralthuam neih chuang liam an dahkhawm, vaivutten a bawm mai maite pe tura ngenin, Ukraine chuan NATO thlawhtheihna neih zinga 1% leh tank 1% chu a mamawh a ni, a ti.

Russia-in a run hnuah, khawthlang ramte hian Ukraine sipaite thuam chakna tur hian anti-tank leh anti-aircraft missile bakah ralthuam tenau leh invenna lam hmanruate pawh an lo pe tawh a, mahse ralthuam lian tham leh thlawhtheihna lam erawh pek tum an la awm lo.

President Zelenskyy chuan, "Ni 31 chhung kan nghak tawh a, tunge Euro-Atlantic community enkawltu hi?" tiin khawthlang ram hruaitute chuan Russia an hlauh avangin an supply ngam lo niin a sawi.

Ukraine interior ministry adviser Vadym Denysenko chuan nimin khan Russia sipaite hian fuel leh food storage centre-te an kapchhia tih sawiin, sorkar chuan a stock neihte pawh hmun dangah a dah a ngai dawn a ni, a ti.

Russia defence ministry pawhin Ukraine-a Lviv khaw thlang lama fuel deposit bakah military repair plant chu missile hmanga kah chhiat a nih thu a sawi.